رحلة في مكتبتي وبعض ماقرأت من الكتب .

صباح الخير بتوقيتي ومساء الخير بتوقيتكم جميعا :$

 

تدوينة من زماااان وأنا نفسي أنزلها تأخرت لسببين :$ اول شي الجامعه والاختبارات:$  ثانيا : كان فيه كم كتاب ناويه احطهم بهذا البوست :)

 

تدوينتي اليوم بتكلم فيها عن اخر الكتب اللي قرأتها . طبعا الكتب من رأيي الشخصي وميولي بالقراءة . أنا من النوع اللي مو مره مع الروايات بس اغلب الكتب هنا هي روايات هههههههه حبيت اغير . قلت بصير كل طلعه للمكتبه انوع مابين الثقافي وتطوير الذات والروايات . 

 

 

 

 

 

 

 

 

خير صديق في الزمان كتاب *

 

انصحكم تقرأون جد عالم ثاني. لحد يقول مافي وقت فيه وقت بس لازم نغير الأولويات . اول سنه بالجامعه اتلخبط نظامي كله وتركت القراءه بعدين السنه اللي بعدها وانا ارتب اهدافي اكتشفت ماقرأت الا كتابين حزنت على نفسي :(

صرت السنه هذي اقرا الكتب بطريق الجامعه وقبل النوم واحيانا الصباح بالويكند او بيوم الاوف .

 ماحبيت اكثر كتب وتصير ممله بس اذا حبيتو بكتب زياده .

 

نبدأ بسم الله ..

 

اول كتاب بتكلم عنه هو ....

 

 

قبيلة تدعى  سارة . للكاتبة : سارة مطر.

لما شفت الكتاب واسم الروايه تحمممست جدا . لكن للأسف طلع ماخذ اكبر من حجمه ممل . جريء وبالنسبه لي مضيعة وقت .

 

اللي بعدو ....

ساق البامبو . ل سعود السنعوسي .

قرأت الكتاب بتطبيق المكتبة الجامعة .

الرواية وأسلوب الكاتب تخليك تعيش جو معاهم ، يتكلم عن مشاكل الخدم ومعاناتهم بالخليج تحديدا بالكويت . قرأت انهم بيمثلونه مسلسل رمضان الجاي :)

بس فعلا مؤثر  ويلامس القلب . لما خلصته حسيت اني فاقده شي:(

 

اقتباس :

 

 

الكتاب الثالث :

 

رواية هناك .. ل إبراهيم عباس .

جمييييله وخيالييييه جدا بعيده عن الواقع P:

السرد جمييل وممتع الوصف دقيق يصور لك كل شي كأنك معاهم .

 

اقتباس :

 

 

 

 

 

الكتاب قبل الأخير :

 

7:46 م للكاتب عبدالله المغلوث .

يتحدث عن التشجيع والتمسك بالاحلام خفيف وظريف .

مفعم بالأمل والايجابية ويحكي قصص للناجحين .

اللطيف في الكتاب هو سبب تسمية الكتاب :)

 

اقتباس :

 

 

 

اخر كتاب هو :

 

ل مهدي الموسوي .

 

طلبت من الله كل شيء لأستمتع بالحياة

فأعطاني الحياة لأستمتع بكل شيء.*

 

الكتاب يحتوي قواعد لفهم الحياة والتصالح مع الماضي يتحدث عن الإيجابية ومليان حكم , فيه بعض الأفكار والقصص المكرره

لكن مايمنع ان جميل وأفضل من غيره .

 

اقتباس :

 

 

حاليا أنا أقرأ هذه الروايه :$

 

وأتمنى انكم استمتعتوا بالرحلة القصيرة :$

 

الروكتان لعلاج حب الشباب #الجلسة_الأولى

اهلين بنات كيفكم اخباركم ؟

قبل شهرين يمكن نزلت بوست اني بديت استخدم الروكتان عشان اعالج حب الشباب .

طيب انا بشارككم جلساتي أول بأول واحكيلكم ايش النتيجة النهائية ان شاء الله  .

 

قبل سنتين فجأة طلع بوجهي حبوب كثيرة ! ماادري من ايش كنت وقتها توني دخلت الجامعه .

ف جلست ابحث ايش الحل وايش الحل وحصلت يوتيوبرز أجانب اتكلمو عن شي ماشاء الله فرقت بشراتهم

قلت اجرب وجربت وماشاء الله خفت كثير بس انه ترجع وتعرفون الحبوبالصغيرة تنرفزني كثير .

المهم حجزت موعد عند دكتور وشاف الحبوب جا قالي سمعتي بالروكتان ؟ قلتله ايوه . قالي اش رايك تاخذينه قلت تممام .

وفعلا حجزلي جلسه ثانيه عشان احلل قبلها واخذ وزني .

 

 

 

 

لمن جا الموعد عطاني الحبوب نفس اللي بالصورة عطاني حق 3 شهور . اول شهر اكل حبه (20 mg )  والشهرين اللي بعدهم حبتين (40mg ) .

 

ايش اهم النصايح ؟!!

1- اول شي قالي ممكن يطلع بوجهك حبووب لا تخافين .

2- قالي في ناس تجيهم اعراض جانبيه الم اسفل الظهر او بالركبه عاادي . ^^ انا الحمدلله ماجاني=)

3- مهم مهم الترطيب الحبوب هذي تجفف البشره والعيون والشفايف وممكن الانف . ف نحتاج كريم طبعا عندنا من أول , قطرات عيون , قطرات انف , مرطب شفايف او الفازلين . وطبعا الموييه نكثر منها .

4- حاولي تقللين الدهون علشان الكوليسترول .

5- ابعدي عن الماسكات ومقشرات الوجه والجسم والحمام المغربي .

6- الواقي مهم اساسا حتى بدون ماتاخذين هالعلاج بس معاه تهتمين اكثثر .

7- لو كنتي متزوجه ماتاخذينها وانتي مرضعه . وانتبهي من الحمل لأنه يسبب تشوهات للجنين .

8- لا تؤخذ هذه الكبسولات الا بإشراف الطبيب وبعد عمل التحاليل اللازمة.

 

 

نتيجتي مع الجلسه الأولى :

خفت الحبوب كثير مع انه المفروض مايبين الحين فرق كبير . بس ممكن بين فترة وفترة تطلع حبه وحده  بالكثير حبتين .

عانيت اكثر شي من جفاف الشفايف والوجه .

من الشهر الثاني عانيت من احمرار بعيوني التزمت بالقطرات والوضع تمام حمدلله . ونفس الشي مع انفي .

موعدي الشهر الجاي بعد 3 اشهر ان شاء الله .

 

 

اقولكم ان شاء الله بالبوست الجاي اذا شفت التفاعل بنزلكم معاه النتيجه المنتجات اللي استخدمتها وافادتني

واللي ما افادتني تمممام ؟

 

وبس بوست خفيف =)

مع الجامعه صراحة الضغط كل مستوى يزيد . الحمدلله يارب .

بس ادعولي =)

 

مرطبات الجسم #منتجات_خلصتها

 

سلام بنات :$

كيفكم اليوم :$  بحكم ان بشرة جسمي جافه ف أعاني شويه مع مرطبات الجسم ف عشان كذا بحكيلكم عن المرطبات اللي خلصتها طبعا بعضها تناسب البشرة العادية .

 

اول شي كريم مرطب من دوف هو ثقيل ريحته نوعا ما مقبوله .

الترطيب جممميل صح انه ثقيل بس احطه بعد الشور .

هل برجع اشتريه ؟ لا , لأن فيه مرطب بالنسبه لي افضل بتكلم عنه تحت :$

 

 

 

 

 

 

المرطب الثاني هو زبدة الجسم من بلمرز جايبته على اساس ترطيب

ثقيييييل مدري كيف ينحط عالجسم ريحته قويه وماحسيت بترطيب قوي مقارنة بسعره .

هل برجع اشتريه ؟ طبعا لا وبقوووة .

 

 

 

 

 

لوشن الجسم من بودي شوب المقاس صغيير

فاااشل بس ريحة صراحه :( عموما بشكل عام اللوشنات يصير ترطيبها اقل

وانا استخدم اللوشنات قبل النوم .

 

 

 

 

 

 

كريم اليد من بودي شوب .

ترطيبه عادي يعني مقبول :$ لكن ريحته قويييه ماحبيتها ابدا ابدا .

هل برجع اشتريه ؟ لا لأن فيه منتجافضل بالنسبه لي بالاضافه ان العلبه ماعجبتني موب عمليه .

 

 

مرطب لليدين الجافه من نيفيا .

هو حبيبي :$ اغير المرطب ارجع اشتريه ترطيب من قلب

وريحته عاديه .

هل برجع اشتريه ؟ ايوه برجع اشتريه الا لو طحت على الافضل .

 

 

 

 

مرطب الجسم من سيبا ميد ترطيبه جددا عادي

وريحته غريبه بس موب شينه كأنها ريحة باودر يمكن :$

ماابغى اظلمه بس احسه ينفع للبشرة العاديه احس بتصير نتيجته حلوه >3>3

هل برجع اشتريه ؟ لا .

 

 

مرطب دوف للبشرة الجافه اشتريته مرتين افضل بكثييير من مرطب دوف اللي فوق :$

احب قوامه مو ثقيل ولاخفيف طبعا احب احطه بعد الشور .

هل برجع اشتريه ؟ yes yes yes

 

 

كريم دوف بزبدة الشيا .

اللوشن هذا استعمله عادة قبل النوم . ريحته غبيه شوي .

بس ترطيبه جمممميل :$ بسرعه تمتصه البشره .

هل برجع اشتريه ؟ اكيييد .

 

 

 

هذا المملوح كنت حاطته ببوست مشترياتي من البحرين كنت جايبه 2 :$

جميييل جايبته من فكتوريا سيكرت :$

ترطيب ترطيب يجنن وتمتصه البشره .

معطر فلذلك غصبا عني بس قبل النوم .

هل برجع اشتريه ؟ ايوووه بس بجرب الروايح الثانيه :$

 

 

هذا هو البوست اتمنى استفدتوا منه :$

 

insta:  lamia.blog

twitter:  lamiia_4

snapchat :    ask me :$

 

 

تجهيز شنطة الجامعه *.*

السلام عليكم .. كيفكم اليوم ؟ تجهزتوا للدوامات :$

من زماااان ما كتبت تدوينه :( 

بمناسبة ان الدوامات جت قلت خليني اكتب تدوينه عن تجهيز شنطه الجامعه :$ ممكن اذكر وحده بشي ناسيته او حتى للمستجدات :$ لاني مدري وش بحتاج .

فيه أشياء انا ماصورتها بس بكتبها لكم ..

طبعا هالاشياء مو كلها نحتاجها يوميا وممكن بعدين تكتشفين شي ناقصك ف تحطينه ~

 

اول شي بوريكم شنطتي اللي اشتريتها جبتها شنطه ظهر منها  تغيير لأني كنت اجيب شنطة كتف , ومنها انه عندي يوم فيه اربع محاضرات :( مدري شفتها حب من اول نظره هههههه

 

جبتها من spring دبي , في الرياض دخلت كم مره ماحصلتها ..

 

 

حبيت فيها التفاصيل .. واهم شي اهم شي الجيوب كثيره لأن حوستي واغراضي كثيرة ف تسهل علي ترتيبها :$

 

هذي من قدام جيبين وجوا فيها جيب واحد .. اللون ماعندي شي زي كذا

 

 

ناخذ جوله اوريكم ايش فيها :$

 

 

 

 

الجيب اللي تحت فيه العطر +مناديل + كريم + معقم + بوكي ( البوك  عادي اخر الترم ينسحب عليه تصير الفلوس بجيب الشنطه ههههههه

تقريبا حطيت الاشياء اللي احتاج تكون مستعجله اخذها بسرعه

 

الجيب اللي فوق حطيت فيه اهم الاشياء بطاقتي (ماالبسها بس حاطتها عشان ماتضيع ) انا كنت حاطتها بالبوك بس مرات اطلع البوك اذا بطلع مشوار وانساه ف مستحيييل ادخل الجامعه بدونها .

سماعات عشان سناب شات :$

مفتاح البيت

والهوواوي بس ماصورته :$

 

 

الجيب الداخلي فيه هايلاترز والاله الحاسبه واوراق ملاحظات

وكمان زياده قلم رصاص

 

 

 

 

هذا في داخل الشنطه نفسها ملف مقوى احلى شي صراحه عشان ماتنحاس اوراقي لان الهووم وورك تكون بالاوراق واحط الكلندر اي اختبار او تسليم  واجب او تسليم برزنتيشن احطه عشان اكون عارفه كل شي واحيانا اذا مااحتاج الدفتر كثير احط اوراق بالملف وخلاص .

 

 

 

 

 

الدفتر عاجبني عملي وفيه مكان للقلم واحلى شي من جوا الجيوب احط فيه ايميلات التيتشرات وتوزيع الدرجات

 

 

هذي محتويات شنطه الميك اب :$

لصقة جروح + بنادول + مشابك شعر + مقص اظافر+ ربطة شعر .

النظارة الشمسيه علبتها كبيره فحطيتها معهم :$

مناكير مدري ليش بس  احيانا اتحمس والا اكون فاضيه

البلاشر والمسكرا احطهم بالبيت بس احيانا تروح علي نومه يكون معي الشي الاساسي الحق احط فالجامعه ونسيت احط بودرة الحواجب .

طبعا الروج اساسي .

ونسيت شاحن الجوال اهههم شي .

 

مرات احط معاي كتاب بعد .

 

زي ماقلت لكم فيه اشياء تصير زايده تستغنين عنها بعدين .

وفيه اشياء البنات يجيبونها انا احب احطها في البيت وخلاص زي الواقي والكريم المرطب .

 

اذا حبيتو البوست وودكم اكتب بوست عن يوم في حياتي اكتبو لي في التويتر @lamiia_4

او انستقرام @lamia.blog

 

وشكرا لكم ...

 

كيف نحقق اهدافنا ؟!

انا كان عندي مشكله اني احدد  أشياء اسويهم خلال الأسبوع بس للأسف يخلص الأسبوع وأنا ماسويت شي :(

وجربت أشياء بس ماش :( وبنفس الوقت اذا تتذكرون تدوينة بداية جديدة ل 2015  هنننا :$ حاطه اهداف حسيت اني بديت انساهم :/

 

 

 

 

 

طيب اضفت كم خطوة بسيطه بس حسيت اني زدت من انتاجيتي وانجازي بالتالي راضيه عن نفسي ..

 

بسوي زحمه بقولكم ايش نحتاج :$

 

 

مقص , قلم حبر , قلم سبوره , قلم هايلايتر .

شكلين أوراق ملاحظات .

monthly planner تقويم شهري للتخطيط :P  هذا انا سويته على ذوقي وطبعته :$

التقويم للفصل الدراسي الثاني . تحصلونه بمتجر قرطاسيه جاهز للتحميل :$ عندي منه 2 واحد اخذه للجامعه عشان اعرف الاختبارات والواجبات . وواحد اللي بنستخدمه اللحين :$

 

 

 

اول شي نمسك أوراق الملاحظات وتفكرين ايش الأشياء اللي تبغين تسوينها هذا الأسبوع ..

مثلا : مشروع - تدوينة - ترتيب .... إلخ .

 

 

بعد كذا نجيب التقويم هذا ونقص الأسبوع اللي نحتاجه وتكتبين الأشياء اللي كتبتيها فوق بأي يوم تبينها , لا تضغطين نفسك

خلي شي واحد باليوم عشان تنجزينه .

واليوم اللي يخلص اشطبيه بالهايلايتر عشان تحسين بالسعاده :$

 

بعد كذا نجيب هذي وتحددين عليها بس شيئين :

اول شي الاختبارات والكويزات .

ثاني شي تكتبين ايش انجزتي من اهدافك السنويه يعني مثلا خلصتي قراءة كتاب

كتبتي تدوينه تعلمتي شي جديد اكتبي .

 

 

زي ماقلت تشوفين اهدافك السنويه ايش :

مثلا انا هدفي اقرأ 12 كتاب .

راح اكتب هنا قراءة كتاب وبنهاية السنه أكون قريت 12 كتاب ..

يعني نقسم الأهداف الكبيرة على اهداف صغيره ونفس الشي هالاشياء تصير قدامك علشان ماتنسينها ..

 

 

وهالطريقة تفيد اللي ينسون اشغالهم بعد نفسسي يعني P:

 

اسعدوني بالتعليقات ...

 

 

كيكة الفراولة اللزيزه :$

كيفكم ؟ اليوم جايبتلكم  كيكة الفراولة بالشكولاته ..

طعمها يممي وهي سهله ومقاديرها موجوده , يعني مالكم عذر قوموا سووها :$

 

 

 

اول شي نسوي الكيكه :

كاس حليب سايل .

كاس سكر .

نص كاس زيت.

3 بيضات .

ملعقتين شكولاتة بودرة .

شوية فانيليا .

اخلطيهم بعدين اضيفي لهم :

كاس طحين .

ملعقة كبيرة باكينج باودر.

بعد كذا اخلطيهم سوا وصبيهم في صينية التارت . (اذا حسيتي المقدار كثير حطيه فصينية ثانية).

دخليها الفرن وبعدين خليها تبرد واقلبيها .

 

الصوص :

ملعقتين طحين + ملعقتين زيت اخلطيهم على النار شوي .

بعدها اضيفي كاس حليب سايل + بيالة سكر + ملعقتين تشوكلت باودر .. صبيهم على الطحين واخلطيهم اذا بدت تتماسك شيليها وصبيها فوق الكيكه بنص الدائرة .

خليها تبرد شوي بالثلاجه بعدين قطعي الفراولة وحطيها فوقها :$

 

وبس وصفه خفيفه ولزيزه جربوها ووروني تطبيقاتكم :$

 

what's in my cross bag ?

سلام كيفكم ؟

بالفترة الأخيرة صايره احب الكروس باق دخلت قبل فترة بيرشكا ابغى تيشرتات خفيفه وشفت الكروس وليتني ماشفتها ههههههههههه كل الناس صار عندهم منها اشتريت الكحلي لأن ماعندي لون كحلي وحبييت .

اشتريتها ب 114 ريال أتوقع .

 

 

 

 

 

 

فاقترحت علي صديقتي الجميله انزل بوست ايش احط فيها :$

هالشنطه تتعبني بشي انه حوستي  كثيره ولازم استغني عن أشياء كثييير :( هههههههه بس تعودت .

 

طيب نشوف ايش احط بشنطتي :$

 

 

اهم شي مناديل جيب :$

وفلوس . ابغى اشتري بوك صغير بس ماحصلت شي على مزاجي .

والنت .

روج :$

سماعات طبعا

عطر :$ ممكن تاخذون عطر صغير يخفف اكثر .

وكريم يد من بودي شوب ترطيبه حلو بس ريحته قوي فيه نسبة وقاية من الشمس ..

 

التدوينه هذا حطيتها بالتويتر والانستقرام .. لانها خفيفه وقصيره :$

وأتمنى لكم ويكند سعيد يارب ...

 

الوقاية من الشمس ..

مساء الخير ي جميلات اخباركم ؟!
اليوم بتكلم عن شي مهم وكثير مننا يتجاهلونه , البوست اليوم بيكون عن الوقايه من أشعة الشمس واهميتها ..

 

 

 

 

 

 

اذا انتي ماتهتمين بواقي الشمس !!
توقعي بقع داكنه والكلف . توقعي حبوب وتجاعيد! انتي بغنى عن هذي المشاكل بشي بسيط ولا يأخذ منك وقت . بس حافظي على واقي الشمس .

طبعا اذا حافظتي على الواقي انتي حافظتي على بشرتك للمدى الطوويل والقصير .

واقيات الشمس اشكال وأنواع فيه لوشن وفيه كريم وفيه سبراي , فيه اللي معاه أساس , وفيه اللي حمايته 15 وفيه 30 ...
والشركات لا تعد ولا تحصى .. يعني المجال مفتوح لك .

انا عن نفسي احب تكون الوقايه من الشمس 50 واحب الكريم .. وبشرتي مختلطه عشان تقيسون على نفسكم .
اما بالنسبة للشركات مو محدده شي معين ..
جربت قبل كذا نيفيا .. جددددا فاشل ووجهي يلمممع منه :(

بعد كذا جربت نيتروجينا .. مو سيء بس موب حلو :/

اخر  شي جربت من شركة Castalia   كنت ابي بايوديرما ونصحني الصيدلي بهذا .. سعره 120 او 140 ريال من صيدلبة  وايتس .

حبيته صراحه بس عيبه فيه ريحه موب زينه بس مجرد ماتحطين الواقي تروح .. حجمه 50 مل .. والوقايه حقته 50 .

طيب الواقي ياجميلات تحطونه قبل ماتطلعون بنص ساعه بعد الكريم المرطب تحطينه وبس :$ مافيه صعوبه بالموضوع ..
وفيه نصيحه ان الواقي ينحط حتى بالبيت عن نفسي ما احط ..
وتختارين الواقي المناسب لنوعية بشرتك ..
وحتى الشفايف فيه لها مرطبات للوقايه من الشمس ..


وبس هذا بوست خفيف واحسه مهههم لكثير بنات .. تعليقاتكم تهمني ..

 

ايش استفدت في دورة كيف تكوني شخصية ناجحة :$

هلا والله :$ شمسويين ؟!

الخميس اللي فات حضرت دوره في الجامعه جد جد انبسطت :$

قبل لا نتكلم عن الدوره كثييير بنات مايعرفون من وين يشوفونها او وين مكانهم في الجامعه .

حسابهم بالتويتر @anshetah_ssd
مكانهم في A4 خدمات الطالبات , الدور الثاني , مكتب 2.106 والتسجيل مكتب 2.100

انتي تفتحين التويتر تشوفين الدورات اللي تناسبك حسب الوقت واليوم .
ممكن أحيانا تقولك انه مافيه مقاعد بس انتي تعالي بوقت الدوره واذا فيه مكان بيدخلونك ان شاء الله . بس عادة يصير فيه مكان ..

وبيوم الدوره تروحين توقعين ويعطونك ملف فيه محتويات الدوره ..

الدوره اللي حضرتها عنوانها كيف تكوني شخصية ناجحة ..
كانت من إعداد د.جيهان رمضان .
مررررره عسل هالدكتوره وحتى استأذنت منها اني اكتب هالتدوينه يعطيها ربي العافيه ..

بالبدايه كنت متوقعه ان الجو جو محاضره ونسمعها وهي تلقي الدوره . بس بالعكس جو مررره مرره مريح كأنك جالسه بمكان انتي متعوده عليه والبنات كانوا جميلات روحهم حلوه ..

ايش اهداف الدوره هذي ؟
تكتشفين ذاتك .
تحددين كيف تكوني انسانه متميزه .
وكيف تبنين ثقتك بنفسك .

طبعا بختصر نقاط الدوره ..

بس بتكلم لكم عن الدكتوره .
هي كانت درجاتها بالثانوي عاليه ماشاء الله بالمقابل الكل يتوقع منها انها تتخصص طب او هندسه .. لظرف ما ماقدرت تحل كويس بالقدرات ..
انقبلت تخصص خدمة اجتماعية , طبعا تقول زعلت وصحت ولا تقبلت التخصص بعدين استوعبت انه اكيد هو خيره , وطورت من نفسها ماشاء الله ..
هي ايش نصحت تقول لا تدورين شي تعلقين فيه اعذارك .. يعني والله انا كويس اني نجحت ماكنت ابغى هذا التخصص  انا ظروفي ماتسمح لي اذاكر ......

أولا : كيف تكتشفين ذاتك وتجني ثمار موهبتك ؟
اذا انتي اكتشفتي نفسك هذا الشي بيساعدك انك تطورين مهاراتك وتقاومين القلق والتوتر ..
يعني اذا انتي كتبتي اهدافك عالورق بتوسع افاقك وتخليك تفكرين بطرق مبتكره عشان تحققين هالاهداف .
وتحتاجين انك تقرين اهدافك وخطتك وتفكرين باللي تملكينه علشان تحققي هالاهداف .
وما ننسى الانترنت استغليه ونظمي وقتك لانه ينمي قدراتك وتوسع تفكيرك .
ركزي بمجال واحد علشان تتمكنين من التميز والابداع .

ثانيا  : ماهي ثمرات الثقة بالنفس ؟
1- اذا انتي عرفتي نفسك وقدرتيها راح تحسين ان حياة كل شخص فيها اللي يميزها عن غيرها . يعني هذي تميزت بدراستها بس ماتميزت بلبسها ووحده تميزت انها اجتماعيه بس ماتميزت بالرسم !
2- تدركين امكانياتك وقدراتك .
3-تتخذين قدوتك بالحياة .
4- توضح لك اهدافك .

المعوقات اللي تواجهك اثناء محاولاتك لتغيير خططك السلبيه :
1- مافي اهداف ولا خطط .
2- التكاسل والتأجيل .
3- عدم الاستمرار في التنظيم .
4- سوء الفهم للغير وتوقع رد فعل سلبية من الاخرين .. جد هذي ياكثر مانشوفها .
5- سرعة اليأس . لا تيأسين خلي ايمانك قوي وانتي قد التغيير .

ثالثا : خطوات التميز :
1- احرصي انك تكوني الأولى في مجالك .
2- يحتاج إليك الكل ولا تحتاجج اليهم فالكل يسألك .
3- اقيمي علاقات صادقه مع الجميع وحافظي على ثقة واحترام الاخرين .
4- كوني متحمسه لشغلك وتكيفي مع الأشياء اللي تبين تسوينها وتللذي بممارسة هذا العمل .
5- لاتضخمين الأمور .
6- الشخصيه تتكون بالتفكير مو بس بالمعلومات .

 

 

بالنهايه حبي نفسك قبل كل شي ..

تابعوني في الانستقرام @lamia.blog

 

واقترحو علي بوستااات :$

 

مشترياتي من البحرين ^_^

 

هلا هلا :$ شمسوين كيف بداية الترم معكم ؟

 

والله علطول من اول أسبوع اعطتنا اختبار الله يسامحها دوبنا ماستوعبنا ان العطله خلصت هههههههه الا على طاري العطله كيف كانت عطلتكم سافرتوا والا بالرياض ؟ عادي فضفضو سولفوا احب السواليف :$ تعالوا بالانستقرام هذا حسابي @lamia.blog

والتويتر نفسه بعد :$

 

عاد احنا بالعطله رحنا يومين البحرين صعنونه أصلا .  الشي الحلو انه كان وقت تخفيضات ، وانصدمممت بمولاتهم ماتوقعتها حلوة كذا يعني باث اند بودي كان 75% بس فيييه أشياء حلوه حنا بالرياض من يصير 50% يختفي كل شي ههههههههههههه .

 

المولات فيه السيف هو اللي حبيته وبضاعته حلوه  ، مودا مول نفس سنتريا بس لساته جديد مافتح كلشي ، والسيتي سنتر هو الكبير فيه محلات كثييير وفيه توري بورش وايقنر هذولي مو عندنا بالرياض ، وفيه مولات ثانيه بس مارحنا لها

 ..

 

هذي صورة جماعية للمشتريااات ..

 

مريت باث اند بودي هذي اكثر ثلاث روايح حبيتها هذولي الحجم الكبير .

 

ريحة blackberry bramble tea

 

 ريحة bellini café .

 

 ريحة autumn .

ننتظر الخريف الجاي ونشغلها ههههههههه لازم نعيش نفسنا جو انه عندنا 4 فصول بالسنة.

 

كل الشمعات كانو ب 95 ريال وصارو 20ريال .

 

المعقمات ندمممت اني ماقشيت لان كان فيه أشياء تحمس بس استعجلت مااخذت الا هذا ب 5 ريال .

 

 

 

 ومريت فكتوريا سيكرت عنده أشياء حلوه بس مكتفيه حاليا باللي عندي .

اخذت كريم كان ب 70 او 75 ريال اخذته ب 25 ريال .

 

هذا اسمه ريحتته جمييييله :$

 

 

 

 

احلى شي لقيت عندهم منتجات ذا بالم بس مو بمحل لا زي الكشك كذا P:

عاد دايم ودي اخذ بسبب اشكالهم تجنن :(

اخذت اضاءة ماري لو . سعرها ب 140 ريال .

جمييييله احطها على عظمة الخد .

 

 

 

ننتقل ل اتش اند ام . ماشفت الملابس كلها بس اخذت هذا الشي حسيته مو من ستايلي يعني نغير شوي

تخيله مع بلوزه  ساده راح يعطي شكككل :$ وروج عنابي اهم شي  هههههه

 

من زمان خاطري بسكارف ابيض وفيه حركه يامورد او شي :$

احب السكارفات والاشياء الزحمه اذا مالك خلق تلبسين والا تجهزين لبس اقرب بلوزه ساده وفوقها سكارف ههههههههه ايه والله احيانا نتعيجز P:

 

جممممميل :( ماقد شفت بالرياض كذا عند اتش اند ام .

الوانها حلوة :(

 

هذي كنت  ماسكه نفسها فضي بالرياض ومتردده اخر شي تركتها  ولقيت هذي لونها يعععععععععذب :(

 

 

 

كان خاطري بفلات بس ماحددت من أي محل بالضبط دخلت اشوف مايكل كورس ولفت انتباهي نفس هذا الأسود قلت يجي مع كلشي

اشوا انه مافيه مقاسي هههههههه اخذت البني وحبيته اكثثر :$

سعره ب 660 ريال .

 

ومريت spring مافيه شي حلو بالجزم تكرمون بس حبيت هالخواتم الذهبي الساده بالتحديد جميل :(

 

 

 

 

فور ايفر 21 جمممميل واحب اكسسوارته حلوه وعملييه .

اخذت هذا السلسال طوييل وناعم حلو مع لبس نعوم :$

 

برضوا حبيت :$

 

ينفعون للدوام احس .

 

تجنن لبستها كم مره

تتسكر بسهوله بس فتحها صعب شوي

وكل شوي اعدلها تدور الاسواره على يدي .

 

مع بعض واحد طويل وواحد قصير .

الطويل لبسته تحت الاسكارف وطلع حلووو .

 

هذا هابين فيه ب 200 ريال الناس يشترونه .

احس مايستاهل :$

لقيته بفور ايفر يمكن 25 او 30 ريال . بس مافي الوان :(

 

 

حبييييييييييييت :(

 

 

ناااعم :$

غريب شوي ماعندي من هالحركات ..

 

هذا جد عاجبني كم مره لبسته :$

 

 

وخلص البوست أتمنى انه عجبكم :$ يارب انه مو طويل وانسحب علي هههههههههههههه

اكتبو لي وش حابين يكون البوست الجاي ؟

ولا تنسون فولو بالانستقرام والتويتر حساباتي كتبتهم بأول البوست :$

وبس أتمنى لكم ويكند جمييل ان شاء الله .