بداية جديدة 2015

3 ايام ان شاء الله وبعدها بنبدا سنه جديده ميلاديه و ٢٠١٤ مرت بكل اللي صار فيها من انجاز وفشل او تجارب تعلمنا منها .

خلونا في ٢٠١٥ نفتح صفحه جديده كلنا بداية كل سنة نقول  خلاص بالتزم بالرياضه بنقص وزني و بحط لي اهداف واحققها....  وقائمة طوييييييله بالاهداف اللي تجي نهاية السنة ولا حققنا فيها هالاهداف . 

السنه هذي بنخليها غييير اذا ماحققنا اهدافنا نبي نكون ماضيعناها نبي ننتبه لنفسنا ولوقتنا . نبي ٢٠١٥ تصير نقطة التغيير الداخلي . 

انتي ماتقرين كتب هالسنه ابدي اقري كتب ، انتي تقرين ٤كتب بالسنة هالسنه خليهم ٨ . 

مو لازم الاهداف تصير واو وشي مره كبير بالعكس الاشياء الصغيره هي اللي تسوي تغيير كبير ؛ يعني انا السنه اللي فاتت قررت اني بساعد الناس  طبعا هالشي اكثر شي طبقته فالجامعه والحمممدلله جددا راضيه عنه يعني سععاده اذا انتي سعادتي وحده متوهقه او شي طبعا نفس الشي مو لازم مسااعده كبييره ممكن اذا مهي قادره تجيب الملزمه جيبيلها معك ، بعض المرات اصور لها فالجوال الاشياء المهمه او تلخيص كتبته وانا اذاكر يعني هالاشياء ؛$ 

خلي هالسنه غير من ناحية افكارك خليها ايجابية وفيها تفاؤل هالشي مااقولكم انه عندي تمممام يعني مرات غصب غصب تدخل افكار تشاؤميه ..

واخر شي احسني الظنحطي لكل شخص اعذار وظروف ولا تنسين ان بعض الظن اثم .. 

ليش اخترت السنه الميلادية ؟! 

انا من الناس اللي امشي بالتاريخ الهجري ماتعامل بالميلادي الا بالجامعه . لكن وقت السنه الهجريه كنت ججججدا مضغوطه اختبارات ومشاريع . 

حتى هالفتره مضغوطه بس قسمت وقتي علشان ابدا بالسنه الميلادية .. 

الاهداف :~ 

جيبي ورقه وقلم واكتبي لك اهداف تبينها تتحقق تبين تغيرين فيها حياتك وخلي هالاهداف واضحه 

يعني لا تقولين هدفي انحف هالسنه .     لا قولي هدفي انقص هالسنه ٥ كيلو . 

انتي كتبتي هالاهداف لاتسكرين الدفتر وتنسينها لا حطيها بورقه قدامك اقريها كل يوم اشتغلي للهدف هذا . 

من اهدافي هالسنه : 

-قرءاة ١٢ كتاب .

-شرب ٨ اكواب ماء يوميا. 

-الاكل الصحي . 

واهم هدف بالنسبة لي هو انك تتعلمين شي جديد يااما انتاج فيديو او تتعلمين على برنامج يعني المجال واسع

كتبت ١٦ هدف بس اخترتلكم هذولي . 

وبعد كل فتره تشيكين تشوفين اذا انتي حققتي من هالاهداف او لا علشان يمديك تشتغلي عليها . 

خطط :~

بما اننا خلصنا وحطينا اهداف لنا اللحين بنسوي خطة كيف نحقق هالاهداف . 

كيييف؟! انا اقولكم كيف لو انا حطيت لي هدف نفس المثال اللي فوق اني انقص ٥  كيلو ايش بسوي بحط لي خطة للأكل وللرياضه . تمام ؟ يعني مثلا بنشوف ايش هالاشياء اللي مسمنتك قلة حركة او اكل شبسات او وجبات سريعه حددي هالشي وقللي منه قد ماتقدرين او استبدليه باشياء صحيه . يعني تحبين التشوكلت استبدليها بالدارك تشوكلت تحبين البرقر وهالاشياء سويها بطريقة صحية اكثر ، تحبين الشبسات سويلك فالبيت بزيت اقل وصوص صحي بعد . 

شوفي حسابات بالانستقرام تشجع على هذاالشي سجلي الاغراض وجيبيها من السوبر ماركت . 

خطه رياضيه يعني انتي تبين تسجلين بنادي تبين تسوينها فالبيت تبين برامج رياضيه من النت حددي هالشي وسويه . 

ولكل هدف خططي كيف راح تنفذينه

وش تعلمنا في 2015 ؟ 

سجلي اول باول اي شي تتعلمينة سواء شي ملموس او شي معنوي .. دراستك .. الكتب اللي قريتيها اشياااء كثير ماتنحصر هنا .

تعلمتي تنظيم الوقت اللي هو

قليل دائم خير من كثير منقطع :~ 

هالشي مايقتصر بس بالدين والاعمال الصالحه بكل جوانب الحياة القليل الدائم افضل من الكثير المنقطع . انك تسوين رياضه ربع ساعه كل يوم احسن من ساعه مرتين في الاسبوع ، انك تقرين صفحة قران احسن من انك تقرين جزء فيوم واحد.. 

كل شي فحياتك خليه على القليل الدائم

ماراح نضيع وقتنا :~ 

هالسنة ان شاء الله بنعطي قيمة كبيرررة لوقتنا لأنه نعمة

دايم يضيع اليوم على ولاشي ..! نحط راسنا عالمخده نكتشف اننا زي ماصحينا بنرجع ننام ماسوينا ولا شي مفيد باليوم ! 

زي ماقلنا نحتاج اهداف هدفك تنتظمين بالرياضه سوي رياضه هدفك تسعدين احد اسعديه لو بكلمه ترسلينها له ، وزي ماقلنا القليل الدائم اقريلك صفحة قران اجلسي مع اهلك سوي حلى بس مو كل يوم علشان تجي نهاية السنة وانتم زايدين ١٠ كيلو ؛$ اشياااء بسيطه بتحسسك بالانجااز وفيه شي حلو احب اسويه دايما ويساعدني اني انظم وقتي وانجز اشغالي : اجيب ورقه واكتب كل شي ابغى اسويه واذا خلصت شطبته ؛$ صدق وناااسه اذا خلصتي كل اللي بالورقه .. 

اصلا تحسين حلو انك ابعدتي عن جوالك شوي .. هذي الحركه اسويها مو بس اذا جيت اجهز اشيائي حتى اذا بغيت اذاكر احدد الاشياء اللي بذاكرها واللحين اكتب التدوينات واشطب اللي نزلته ؛$ 

في الحركه بركه :~ 

ليش هالسنه مانتحرك اكثر نمشي ١٠ دقايق الصباح و١٠ العصر نرقى الدرج بدل المصعد :$ الصباح اذا وصلت الجامعه بدري اروح للكليه مشي يمكن ياخذ من ٢٠ الى ٣٠ دقيقه بس كيف اوصفلكم شعوري شعوور جميل تحسين بسعاده وايجابيه ونشاااط مدري بس شي يجنن صراحة ماداومت عليها لأن احيانا اصير ابي اذاكر . 

طيب نرجع شوي للأهداف :$ كتبناهم وجهزناهم طيب كيف نحققهم ؟! 

(١) عبارات تحفيزية قدامك

اكتبي لك عبارات تحفيزيه تذكرك باهدافك حطيها قدامك وخلفية جوالك اذا شفتيها تشجعك على هدفك وتحمسك له :$ 

انا حاطه ورقة عالمراية كاتبه فيها (ابتسمي =) + اذكارك ) تذكرني ابدا يومي بابتسامه علشان اتفاءل بيومي وادري انه جميل وتذكرني بالاذكار اللي دااايم ننساها . 

هذي من اللي حاطتهم عالمكتب :$

 

 

 

هذي العباره حاطتها عالمكتب بعد علشان الرياااضه :$

 

ومرات فجأة يجي على بالي شي اكتبه واحطه :$ مرات اكتب دعاء او عباره اعجبتني واحيانا اكتب الحمدلله لأنه واجبنا نشكر ربي على كل النعم اللي مانحس فيها زي بركة الوقت وانه مر يومنا بدون لانفقد احد الحمدلله اننا نسمع ونشوف ونتكلم الحمدلله اننا ف بلدنا وبين اهلنا الحمدلله ان ربي يسر لنا طلب العلم .. 

(٢) ملف هذا العام للإنجازات .. 

تجيبين لك ملف او ممكن دفتر تكتبين كل شي فيه اهدافك والاهداف اللي حققتيها وخططك اللي ناويه تلتزمين فيه وتدونين كل شي اول بأول علشان تلاحظين كيف طورتي نفسك مثلا افتحيها كل اسبوع او كل شهر شوفي انتي انجزتي والا نسيتي  مو لازم نخلص ٢٠١٥ وانتي حققتي كل الاهداف لو نصها يكفي يكفي انك حاولتي واجتهدتي هذا بحاله انجااز .. 

 

هذا الملف حقي سويته وأنا بأولى ثانوي وماقدرت استغني عنه :$

اول شي حطيت اهدافي وخططي فيه

 

من الخطط اللي حاطتها هي خطة الرياضة ...

 

عاد هنا انجازاتي وش الكتب اللي قريتها واي شي أنجزته بكتبه هنا :$

 

هنا حطيت اول يوم بالسنة وكتبت كلشي سواء وزني وحالة بشرتي وكم كتاب قريت للسنه اللي قبلها وكتبت جنبها 13 أكتوبر بعد 10 شهور ان شاء الله بكتب ايش صار وايش تغيير ..

قبل يومين اشوف بالانستقرام يسوون قائمة للأمنيات الاشياء اللي نفسك تشترينها في ٢٠١٥ صراحه حبيتها :$ ممكن احطها بالتويتر :$ 

حسابي بالتويتر لأي شي @lamiia_4