السنة التحضيرية في جامعة الأميرة نورة . (تجربتي )

بسم الله الرحمن الرحيم .

 

ان شاء الله انكم تمام , اول مدونة لي أتمنى انه هالمدونة تكون مفيده ومرجع لكل شخص .

احترت عن ايش اكتب اول شي بس قررت اكتب عن السنة التحضيرية في جامعة الأميرة نورة . كيف نظام الدراسة فيها وبإيش تفيدك في التخصص .

بالبداية انتي طلع قبولك في جامعة الأميرة نورة سنة تحضيرية مسار عام مكانك هنننا :$

بعد مايطلع قبولك بفتره راح يتحدد لك موعد لاختبار تحديد المستوى في اللغة الإنجليزية .

هالاختبار يفيدك انه يحددون مستواك بالانجلش بناء عليه راح تدرسين بالمستوى المناسب لمستواك .

ويفيدك بالتخصص يعني كل ماكان مستواك بالانجلش اعلى كل ماكان لك أولوية في التخصص وحسب كل كلية والمستوى اللي تطلبه .

السنة التحضيرية في الجامعه هي عبارة عن ترمين تدرسين في كل ترم ثلاث مواد .

ترم راح يكون ( رياضيات + انجلش + تربية صحية )

وترم راح تدرسين فيه ( حاسب + انجلش + مهارات تفكير )

*المواد كلها للعلمي والأدبي مع بعض .

الانجلش ~

راح تدرسين الانجلش في كل الترمين .

يعني لو حددو مستواك ليفل 2 تخلصين التحضيري وانتي ليفل 3  .

الانجلش مايدخل في المعدل بس زي ماكتبت فوق له دور في التخصص .

الرياضيات ~

المنهج بالانجليزي .  لو كنتي علمي راح يكون من الدروس اللي اخذتيها بالثانوي . ولو كنتي ادبي حاولي تركزين واذا مافهمتي  حاولي تخلين احد يشرحلك .

اهم شي تحتاجين تركزييين وتكتبين كل شي مع التيتشر اول بأول .

وتحتاجين تحلين الواجب لانه راح يساعدك انك تفهمين وترسخ المعلومة براسك .

لما درسته كنا نحل الواجب ونسلمه للتيتشر ومرات نحل الواجب عن طريق موقع .

السنة هذي صاروا يحلون عن طريق الكروم بووك (لاب توب يسلمونه للطالبات وترجعينه نهاية السنة )

التربية الصحية ~

المادة كمييية نظري كبيره . احسها تحتاج مذاكرة اول بأول علشان ماتتراكم عليك وقت الاختبار .

تتكلم عن الحمل والتغذية والتلوث وبعض الامراض والاسعافات الأولية .

الماده مافيها اختبار نهائي .

الحاسب ~

الحاسب انجلش بس فيه تعداد وتعاريف كلها بالانجلش بعد .

تحتاجين تترجمين وتفهمين الكلام . وبالاختبارات ماكنا نكتب شي كله اختياري وصح وخطا وفراغات تكون الكلمات موجوده فوق .

والعملي بعد عن طريق الكروم بوك . المنهج العملي كان ( بوربوينت + اكسل + وورد )

مهارات التفكير ~

نفس التربية الصحية فيها كمية نظري كبيييرة تحتاجين تحفظين اول بأول . وتحتاجين تفهمين لانها بالاختبار تقولك اكتبي موقف استعملتي فيه مهارة من مهارات التفكير .

ولا فيها اختبار  نهائي .

ايش فايدة السنة التحضيرية وليش نحتاج نشد حيلنا فيها ؟!

- الانجلش راح يقوي لغتنا راح يفيدنا بالتحدث و له دور زي ماقلنا  بالتخصص بالإضافة انه بعض مواد التخصص ممكن تكون باللغة الإنجليزية ف راح يساعدك بالفهم  ولأنه راح تدرسين مع التخصص انجلش .

- المواد الثانية نحتاج نشد حيلنا فيها علشان  ناخذ المعدل العالي اغلب الكليات يطلبون معدل فوق 3.75 المواد هذي نجيب فيها درجات عاليه علشان نجيب المعدل العالي ان شاء الله .

- المعدل ومستوى الإنجليزي للقبول في جميع الكليات راح  يكون تنافسي يعني الأولوية للمعدل والمستوى الأعلى .

ايش عيوب السنة التحضيرية وليش كارهينها ؟!

السنة التحضيرية  صح انه المواد فيها قليلة لكن المتعب فيها "الدوام"

ترم راح يكون صباحي : يعني يوميا تبدا محاضراتك من 8 والخروج يختلف ممكن 12 او 2 او 4 .

ترم راح يكون مسائي : يوميا تخلصين دوامك الساعة 4 لكن محاضرات ممكن تبدا 8 او 10 او 12 .

ممكن يكون عندك يوم فيه بريك ساعتين .

اللي مررره يتعب هو أماكن المحاضرات لأنه كل محاضره بكليه مختلفه ماترجعين البيت الا وانتي متكسررره :(

 

كيف نظام الغياب والحرمان بالجامعه ؟!

كل ماده لها عدد ساعات غياب اذا وصلتيه تحرمين من الاختبار هذا الترم .

يعني مثلا : الرياضيات  ساعات الحرمان فيه 12 ساعه . اذا غبتي بدون عذر مقبول تعطيك انذار اول . انتي غبتي زياده بدون اعذار تعطيك انذار ثاني وصلتي 12 ساعه غياب تحرمين .

وبعض التيتشرات يحسبون الحضور بدرجات .

 

ايش الفرق بين الميد والكويز والفاينال ؟!

الميد هو اختبار نص الشهر مههم .

الكويز هو اختبار قصير .

الفاينال هو الاختبار النهائي .

 

أشياء ضروري اشتريها للتحضيري ؟!

بوت رياضي ومريح لأنه مشي ممكن مع الفلات تتجرح رجلك .

شنطه مريحه وعمليه ممكن شنطة ظهر او كتف .

واقي شمممس مهم مهم مهم والا بيقلب لونك .

 

كيف اقرا جدولي ؟!

اللي بالازرق هذي معلومات عن محاضرة الانجلش .  بينت لك  كل شي ايش معناه ..

 

 

صحيح انه مو وقت دوامات ومتأخر على هذي المدونة ان شاء الله انها مرجع للطالبات الجديدات .

 

بالنهاية أتمنى اني افدتكم .. لأني في يوم من الأيام كنت تحضيري وكنت ابغى القى أجوبة للأسئلة هذي ..

لو عندكم أي سؤال او أي اقتراح اكتب عن شي معين ممكن تلقوني بالتويتر lamia.blog@  او بالتعليقات وشكرررا :$